Bakının "Real Hospital"ında sünnət edilən 4 aylıq körpənin ölüm səbəbi ilə bağlı təfərrüatlar üzə çıxıb. Bu haqda bu gün, 11 iyul tarixində Bakuplus.az Milli.az-a istinadən məlumat verir.
Tibb müəssisəsinin həkimi Samir Hacıbabayevin sözlərinə görə, uşağın timus vəzisində böyümə olub. Bu səbəbdən onda tənəffüs problemi yaranıb.
"İlkin ehtimala görə, körpədə timus vəzidə böyümə olduğu üçün onun fonunda zəiflik olub. Prosedur normal keçib, rahat da icra olunub. Heç bir fəsad olmayıb. Sünnət olunandan 20 dəqiqə sonra uşaq valideyninə təhvil verilib. Uşağın vəziyyəti pisləşib, nəfəs almağı çətinləşib. Körpə sünnətə qədər yoxlanışlardan keçmişdi, bizim xəstəxanada da yoxlanılıb. Başqa şəhərdən gətirilmişdi. Sünnət gündəlik aparılan prosedurdur. Sünnətqabağı genişmiqyaslı müayinə olunmur. Amma klinik dəyərləndirmə aparmışdıq".
Həkim onu da bildirib ki, əməliyyat zamanı keyitmədən istifadə olunub:
"İlkin keyitmədən sonra qan qazları deyilən müayinə aparılıb. Vurulan iynəyə qarşı bir maddə var, o yüksəlir, həmin maddə normasında olub. Uşaqda, ola bilsin ki, tənəffüs problemi olub. Timusu böyük olan uşaqlarda fon olur. Sonradan bu uşaqlarda hər hansı prosedura adaptasiya prosesləri çətin olur. Timus vəzi elə yerdə yerləşir ki, nadir hallarda böyük olur".
