Sosial şəbəkələrdə “Nəriman Nərimanov” metrosunun yaxınlığında özünü veteran kimi təqdim edən bir kişinin kiçik bir qız üçün pul topladığı görüntüləri yayılıb. Bu haqda bu gün, 7 dekabr tarixində BizimMedia-ya istinadən Bakuplus.az məlumat verir.
Dilənən “qazi”nin yanında olan bir nəfər yoldan keçənlərə üz tutaraq kömək istəyib: “TikTok-da lazımsız insanlara “jeton” atırsınız, onlardan sizə fayda yoxdur, gəlin belə balalara dəstək olun ki, Allaha da xoş getsin”.
Videodan görünür ki, yoldan keçən bir çox şəxs hərbi geyimli şəxsə pul verir.
Sosial şəbəkədə müzakirələrə səbəb olan videoda həmin şəxsin hərbi formada olması kəskin tənqid olunub.
Dilənçinin veteran və ya Vətən müharibəsi iştirakçısı olması bəlli olmadığından Daxili İşlər Nazirliyinə (DİN) müraciət göndərilib.
DİN-in mətbuat xidmətinin rəisi, polis mayoru Elşad Hacıyev bildirib ki, sosial şəbəkələrdə yayılan görüntülərdə əksini tapan hallar qanunsuz hərəkətlərdir: “Yardımdırsa, yardım toplama forması bu deyil. Məsələ araşdırılır”.
