Bakının Xəzər rayonu, Türkan qəsəbəsində yerləşən 262 nömrəli orta məktəbin direktorunun doğum gününə pul yığılması ilə bağlı məlumat yayılır. Bu haqda bu gün, 23 noyabr tarixində Bakuplus.az Bizim.Media-ya istinadən məlumat verir.
Qəsəbə sakini, “Yeni baxış ictimai nəzarət” təşkilatının mətbuat katibi Vüqar Əmirovun sözlərinə görə, məktəbin direktoru Kəmalə Babayevanın noyabrın 24-də doğum günü olacaq. Bu səbəbdən hər ibtidai sinif şagirdindən iki manat, yuxarı sinif şagirdlərindən üç manatdan beş manatadək, müəllimlərdən isə müəyyən məbləğdə pul yığılır.
Adıçəkilən məktəbin direktoru Kəmalə Babayeva bu məlumatı şərh edib. O, bu barədə ilk dəfə eşitdiyini qeyd edib və daha ətraflı məlumat üçün Bakı Şəhər Təhsil İdarəsi ilə əlaqə saxlamağı tövsiyə edib. Babayeva doğum günü ilə bağlı sualı cavablandırmayıb.
Bakı Şəhər Təhsil İdarəsindən bildirilib ki, bu məlumatla bağlı araşdırma aparılır.
