Hər il paytaxtda yağan güclü yağışların öhdəsindən Bakının yollarındakı drenaj sistemi gələ bilmir. Bu səbəbdən bir çox paytaxt sakinləri kanalizasiya sisteminin qarşıdan gələn yağıntılara tab gətirə bilib-bilməyəcəyi ilə maraqlanır. Bu haqda bu gün, 8 dekabr tarixində Bakuplus.az Xəzər Xəbər-ə istinadən məlumat verir.
Memarlıq və İnşaat Universitetin Su təchizatı və işlənmiş suların kənarlaşdırılması kafedrasının müəllimi Aqşin Kərimovun verdiyi məlumata görə, paytaxtda drenaj sistemlərinin vəziyyəti yaxşı deyil. Bakının kanalizasiya sisteminin əksər hissəsi kanalizasiya şəbəkələrinə qoşulduğuna görə drenaj suyun nəqlini çətinləşdirir və şəhərdə gölməçələrin yaranmasına səbəb olur.
“Avropa ölkələrində yağış sularını və kanalizasiya xətlərini aparan ayrı-ayrı xətlər, drenajlar var. Yağan yağış, qar sularının drenajlar vasitəsilə axıdılması çox gözəl bir metoddur. Demək olar ki, Bakı şəhərində çəkilən kanalizasiya xətləri 1870-ci illərindir. Bu xətlərin çox hissəsi dəyişdirilməyib”, – deyə Aqşin Kərimov bildirib.
Mütəxəssis bu məsələ ilə bağlı əlavə edib ki, “Azəravtoyol” yol çəkəndə kanalizasiya sistemlərinə fikir verməlidir. Yolları düzəldəndə bir çox yerdə kanalizasiya borularının üstünü bağlayırlar. Həmçinin drenajlı xətlərin çoxu təmizlənmir. “Azəravtoyol” “Azərsu” ilə birgə işləməlidir. Əgər bu yol dağılırsa, həmin yolda təzə drenajlar və kanalizasiya xətləri çəkilməlidir.
“Azərsu” ASC-nin mətbuat katibi Anar Cəbrayıllı bildirib ki, payız-qış mövsümünə hazırlıqlar çərçivəsində təmizləmə işləri keçirilib.
Təmizləmə işləri çərçivəsində təxminən 5 mindən artıq kanalizasiya baxış quyusu və yağış barmaqlıqları bərk məişət tullantılarından, yad cisimlərdən təmizlənib, quyular tam ötürücülük kabeli ilə təmin olunub.
“300 kilometrdən artıq tunelin kollektorun və xətlərin təmizlənmə işləri həyata keçirilib və bu işlər hal-hazırda da davam etdirilir. Bu günlərdə Bakıda ayrılmış yağış su sistemləri yoxdur. Əsasən, yağış suları bizim kanalizasiya kollektorlarına axıdılır və onun vasitəsilə kənarlaşdırılır”, – deyə Anar Cəbrayıllı məlumat verib.
