Bakının mərkəzində binaların məhəllələri baxımsız vəziyyətdədir. Bu haqda bu gün, 2 aprel tarixində Bakuplus.az İctimai TV-yə istinadən xəbər verir.
Binaların fasadı təmirli olsa da, məhəllələrə daxil olarkən tam başqa mənzərə görünür.
“Şəhərin mərkəzidir. Üstdəki küçə “Torqovaya”, Nizami küçəsidir. Bizim küçə Xaqani küçəsidir. Buradakı vəziyyətlə maraqlanan yoxdur. Bir neçə ay əvvəl binanın fasad hissəsi təmir edilsə də, həyətində heç bir iş aparılmayıb”, – deyə sakinlər bildirirlər.
Onlar deyirlər ki, binalarda pilləkənlər uçub, eyvanlar bərbad vəziyyətdədir. Şərait yoxdur, təmir işləri uzun müddətdir aparılmır.
“Bakının mərkəzindəki bu kvartallara italyansayağı həyətlər də deyirlər. Amma bu gün daxili həyətlər bizə həmin o 19-cu əsrin atmosferini, ümumiyyətlə, hiss etdirmir. Çünki nəzarətsizlik var, hansısa bir tələblər, şərtlər yoxdur”, – deyə memar Dilqəm İsmayılov qeyd edib.
Bakı Abadlıq Xidmətindən bildirilib ki, işlər mərhələli şəkildə görülür. Fasadlardan sonra həyətlərin içi də yenidən qurulacaq.
