Bakıda müxtəlif ünvanlarda piyada zolaqları görünmür, bəzi yerlərdə isə tamamilə silinib. Bu, həm sürücülər, həm piyadalar üçün əsl təhlükə mənbəyidir. Xüsusən günün axşam saatlarında sürücülər həmin silinmiş və ya silinmək üzrə olan piyada zolaqlarını görmürlər. Bu haqda bu gün, 29 iyun tarixində Bakuplus.az APA-ya istinadən məlumat verir.
Yollardakı bu cür piyada zolaqları niyə vaxtında rənglənmir? Prosesə nəzarət edən cavabdeh qurum – Azərbaycan Yerüstü Nəqliyyat Agentliyinin rəsmisi (AYNA) Tural Orucov bildirdi ki, rəngləmə prosesi mərhələli şəkildə reallaşır: “Yol nişanlanma xətlərinin silinməsi və rənglərin solması, yoldakı hərəkət intensivliyi və meteoroloji amillərin təsiri ilə əlaqədardır. Nişanlanma xətlərinin yenilənməsi plan üzrə mərhələli qaydada həyata keçirilir. Hərəkət iştirakçıları ərazidə quraşdırılan yol nişanları tələblərinə mütləq qaydada riayət etməlidirlər”.
Nəqliyyat eksperti Eldəniz Cəfərli əlavə edir ki, bu cür zolaqlar hər il xüsusi parlaqlığa malik ağ rəngli boyalarla rənglənməlidir:
“Əslində çəkilən bu zolaqların müddəti bir ildir. Yəni bir ildən sonra bu zolaqlar yenilənməlidir, amma biz şahidi oluruq ki, bu piyada zolaqlarına çəkilən rənglər heç bir il keçmədən, 3-6 aydan sonra solur. Görünür ki, bunlar keyfiyyətsiz və xüsusi parlaqlığı olmayan boyalardır. Cavabdeh olan qurumlar piyada yönümlülüyə, piyada zolaqlarının çəkilməsinə o qədər də diqqət yetirmir. Xüsusən də piyada zolaqları və nizamlanmayan piyada keçidinə 150 metr qalmış xüsusi xəbərdaredici nişanlar da qoyulmur”.
