Bakı qəsəbələrində dincəlmək üçün şərait yoxdur. Bu haqda bu gün, 30 mart tarixində Bakuplus.az ARB-yə istinadən xəbər verir.
Ramana, Zabrat, Hövsan və mərkəzdən kənar digər bir neçə qəsəbədə kifayət qədər çox insan yaşayır. Ancaq onların istirahətləri üçün şərait, demək olar ki, yoxdur. Bu səbəbdən də uşaqlar əylənmək üçün yer tapmırlar. Onlar tez-tez şəhərin mərkəzinə üz tuturlar. Bundan əlavə, onlar palçıqlı, tozlu yollarda oynamağa məcbur olurlar.
“Mədəniyyət infrastrukturu əlçatan deyil. İdman infrastrukturu da əlçatan deyil. Və belə bir vəziyyətdə uşaqlar ancaq kriminala, cinayətə meyilli olurlar. Biz bunu oradan qoparmaq üçün digər alternativləri mütləq inkişaf etdirməliyik”, – deyə deputat Fazil Mustafa qeyd edib.
Memar Elçin Əliyev isə deyir ki, tikinti işləri ilə məşğul olan sahibkarlardan tələb olunmalıdır ki, mütləq binaya uyğun parkinq, park, ticarət zonaları yaradılsın. Bunlar hamısı artıq memar və sifarişçi tərəfindən layihədə nəzərə alınır və həyata keçirilir. Bakının ətrafında hələlik parklar çatışmır.
Əmlak eksperti Ramil Osmanlı isə əlavə edib ki, şəhərsalma qaydalarına tamamilə riayət olunmur. Vətədanşlar öncə evlər tikirlər, daha sonra həmin ərazidə infrastruktur yaranması zərurəti yaranır.
Mütəxəssislərin fikrincə, bu qəsəbələrdə parkların, yaşıllıq zonalarının salınması çox da mümkün görünmür. Çünki həmin ərazilərdə park infrastrukturunun yaradılması üçün genişmiqyaslı söküntü işləri görülməlidir. Bu da ciddi maliyyə tələb edir.
