Bakı-Sabunçu-Bakı marşrutu üzrə əlavə qatar reysi təyin edilir. Bu barədə BakuPlus.az ADY-nin Mətbuat Xidmətinə istinadən bu gün, 1 iyul tarixində xəbər verir.
"Azərbaycan Dəmir Yolları" (ADY) QSC Abşeron dairəvi dəmir yolu xətti üzrə sərnişin tələbatının qarşılanması məqsədilə iyulun 3-dən etibarən əlavə reys təyin edir.
Bakıdan saat 08:25-də yola düşəcək qatar Sabunçu stansiyasına saat 08:42-də, əks-istiqamətdə saat 08:52-də yola düşən qatar isə Bakı Dəmiryol Vağzalına saat 09:07-də çatacaq.
Eyni zamanda iyulun 3-dən etibarən Ağstafadan Bakıya yola düşən qatarın paytaxta saat 23:15-də çatmasını nəzərə alaraq, Bakı-Pirşağı-Sumqayıt istiqamətində saat 22:45-də yola düşən sonuncu sərnişin qatarının hərəkət qrafikində dəyişiklik edilib. Belə ki, 3 iyul tarixindən etibarən müvafiq istiqamət üzrə qatar yenilənmiş cədvələ əsasən, saat 23:45-də yola düşəcək.
Bununla yanaşı, həftəiçi Bakı-Pirşağı-Sumqayıt istiqaməti üzrə saat 13:30-da, Sumqayıt-Pirşağı-Bakı istiqamətində isə saat 14:30-da hərəkətdə olan reyslər həftəsonları və qeyri-iş günlərində də eyni saatlarda hərəkətdə olacaqlar.
Dəyişikliklərlə əlaqədar Bakı-Sumqayıt-Bakı sürət qatarlarının hərəkət qrafiki yenilənib.
