Bakı Slavyan Universitetinin sabiq rektorunu məhkəməyə zorla gətirəcəklər. Bu haqda bu gün, 14 fevral tarixində Bakuplus.az Qafqazinfo-ya istinadən xəbər verir.
Sabiq rektor Nurlana Əliyeva adıçəkilən təhsil müəssisəsinin şöbə müdiri Dürdanə Əliyevanın cinayət işi üzrə keçirilən iclasında şahid qismində ifadə verməlidir. Lakin Əliyeva dəvətə məhəl qoymayıb və iclasa gəlməyib. Bu səbəbdən məhkəmə onun zorla iclasa gətirilməsi üçün qərar qəbul edib.
BSU-nun əlavə və qiyabi təhsil şöbəsinin müdiri, dosent Dürdanə Əliyeva işlədiyi dövrdə külli miqdarda dələduzluq, rüşvət verməyə təhrik etmə və rüşvət almada ittiham olunur. O, bu əməlləri universitetin rektoru Nurlana Əliyevanın iştirakı ilə etdiyini deyir.
Nurlana Əliyeva 2016-2021-ci illərdə Bakı Slavyan Universitetinin rektoru vəzifəsində çalışıb.
