Bakının Sabunçu rayonu, Bakıxanov qəsəbəsi, Səməd bəy Məhmandarov, 8 ünvanının sakinlərinin mənzillərində 13 ildir ki, nə qaz xətti, nə də istilik sistemi var. Bu haqda bu gün, 23 yanvar tarixində Bakuplus.az ARB Xəbər-ə istinadən xəbər verir.
Tikilidə qaz xətti olmadığına görə sakinlər qaz balonlarından istifadə etsməyə məcbur olurlar. Onlar qaz balonlarını gündəlik yeməklərin hazırlanması, eləcə də evin isidilməsi üçün istifadə edirlər.
Sakinlərin sözlərinə görə, həmin binada 84 ailə yaşayır. Hər ailənin evində 2 qaz balonu var.
“Biz 2 aydan bir 24 litrlik qaz balonu doldurub gətiririk. İşıq pulu yazır, qazımız yoxdur, haradasa 50-60 manat mən verirəm, ailələr var ki, 100-130 manat işıq pulu verir. Biz gedib dəfələrlə müraciət etmişik qaz idarəsinə, lakin heç nə dəyişilməyib”, – deyə sakinlər şikayət edirlər.
“Azəriqaz” İB-nin departament rəisi Rauf Əhmədovdan verilən məlumata əsasən, 2011-ci ildən o ərazinin qaz xətləri yararsız vəziyyətdə olduğuna görə qazın verilişi dayandırılıb.
“Həmin binada Fövqəladə Hallar Nazirliyinin (FHN) əməkdaşları da baxış keçiriblər, bina yataqxana tipli olduğuna görə oraya qaz verilməsinin mümkünsüzlüyü ilə bağlı rəy bildiriblər”, – deyə departament rəisi əlavə edib.
Binanın balans saxlayıcısı, 146 saylı mənzil kommunal istismar sahəsi də binanın qəzalı olmasına dair FHN-in rəyi olduğunu təsdiqləyib. Qazın çəkiləcəyinə ümidini itirən sakinlər heç olmasa mərkəzi istilik xəttinin çəkilməsini istəyirlər. Amma bunun da mümkünsüz olduğu deyilir.
“Azəristiliktəchizat” ASC-nin mətbuat katibi Elvin Basqallı bildirib ki, sözügedən bina qurumun balansında olan binaların sırasına daxil deyil. Gələcəkdə bu binanın və digər binaların mərkəzləşdirilmiş qaydada istiliklə təmin edilməsi investisiya proqramlarından asılıdır.
