Sabunçu rayonunda yerləşən restoranda qanun pozuntuları aşkarlanıb. Bu haqda bu gün, 24 iyun tarixində Bakuplus.az Qida Təhlükəsizliyi Agentliyinə istinadən xəbər verir.
Nöqsanlar rayonun Bakıxanov qəsəbəsi, K.Setkin küçəsi, 4081-ci məhəllədə fəaliyyət göstərən “Napoleon Hall” restoranında tapılıb. Belə ki, iaşə obyektində sanitariya qaydalarına riayət edilmədiyi, xammalların qəbulu və saxlanması sahələrində sanitar-gigiyenik vəziyyətin qənaətbəxş olmadığı, eləcə də havalandırma sisteminin quraşdırılmadığı, çirkab su borularının izolyasiya edilmədiyi məlum olub.
Həmçinin işçi heyət üçün fərdi dolablarla təchiz edilmiş soyunub-geyinmə sahəsinin təşkil edilmədiyi, mütəmadi olaraq müvafiq təmizlik işlərinin aparılmadığı aşkarlanıb.
Sadalanan faktlarla bağlı rəhbərlik məsuliyyətə cəlb olunub, obyektin fəaliyyəti dayandırılıb.
