Bakının Sabunçu rayonu, Bakıxanov qəsəbəsində yerləşən 284 saylı körpələr evi baxımsız vəziyyətdə fəalliyət göstərir. Bu haqda bu gün, 21 dekabr tarixində Bakuplus.az ATV-yə istinadən məlumat verir.
Uşaq bağçasında giriş qapısı yoxdur. Valideynlər bildirirlər ki, qapının olmamağı təhlükəlidir: hər kəs binaya girərək uşağın əlindən tutub apara bilər. Bağça, həmçinin illərlə təmirsiz şəraitdə qalır.
Bağçanın tərbiyəçiləri iddia edirlər ki, mövcud vəziyyət tədris prosesinə maneə törətmir və bu gün burada uşaqlara yaxşı təlim-tərbiyə verilir. Mühafizəyə gəlincə bu xidmət Elm və Təhsil Nazirliyi tərəfindən təşkil edilməlidir.
Ərazidə yaşayan sakinlər də bağçanın durumundan narazıdırlar. Onlar da vurğulayırlar ki, uzun illər ərzində körpələr evində təmir işləri aparılmayıb.
Bakı Şəhəri üzrə Təhsil İdarəsindən bildirilib ki, bağçadakı nöqsanlarla bağlı araşdırma aparılacaq, ictimaiyyətə açıaqlama veriləcək.
