Sabunçu rayonu, Bakıxanov qəsəbəsində sökülən binanın sakinləri təzminatdan narazıdırlar. Bu haqda bu gün, 23 noyabr tarixində Bakuplus.az ATV-yə istinadən xəbər verir.
Söhbət qəsəbəsnin Aşıq Alı, 12a ünvanından gedir. Sakinlərin sözlərinə görə, ikimərtəbəli qəzalı bina sökülən zaman yaxınlıqda olan vətəndaşa məxsus məhəllənin hasarı da icazəsiz sökülüb.
“Heç bir xəbərdarlıq olmadan fakt qarşısında qoydular ki, buranı sökürlər. 1-2 saat ərzində də sökdülər”, – deyə ərazidə yaşayan Yalçın Xudaverdiyev bildirib.
Ərazidə tikinti aparan şirkətin rəhbəri Elnur Mustafayev isə deyir ki, hasar sökülməmişdən öncə sakinə xəbərdarlıq olunub. Proses zamanı isə onun evinə zərər vurulmayıb. Onun sözlərinə görə, həmin vətəndaşın evi də qəzalı sayılır, ancaq sakin dəyərindən yuxarı məbləğdə təzminat istəyir.
“Qeyri-qanuni tikililərlə, heç bir mülkiyyət sənədləri olmayan sahələrini öz mülkiyyəti hesab edərək böyük miqdarda kompensasiyalar tələb edirlər. 35 kv.m olan mülkiyyət sahəsinə görə 150 kv.m sahə tələb edirlər. Biz də bunu ədalətsiz hesab edirik”, – deyə o əlavə edib.
Bildirilir ki, binanın əksər sakinləri ilə artıq razılıq əldə olunub. Həmin yerdə çoxmərtəbəli yaşayış binası inşa olunacaq.
