Paytaxtın Sabunçu rayonu, Bakıxanov qəsəbəsi, Aşıq Pəri küçəsində bir müddət əvvəl yeddimərtəbəli binanın beş mərtəbəsi qanunsuz inşa edildiyi üçün sökülüb. Hazırda həmin ərazidə ikimərtəbəli tikilinin üzərində yenidən inşa işlərinə başlanılıb. Sakinlər həmin tikilinin evlərinə yaxın olduğu üçün narahatdırlar. Bu haqda bu gün, 26 sentyabr tarixində Bakuplus.az ATV Xəbər-ə istinadən məlumat verir.
Sakinlərin iddiasına görə, yaxınlıqdakı ikimərtəbəli evin üzərində bina ucaldılır. Bir müddət əvvəl belə bir iş görülüb və sakinlərin şikayətindən sonra, mart ayında həmin bina qanunsuz olduğu üçün sökülüb. Hazırda isə ərazidə yenidən tikinti işləri aparılır.
Sakinlərin sözlərinə görə, yaxınlığında olan 8 mərtəbəli bina da 2017-ci ildə qanunsuz olaraq inşa olunub və onların həyətləri daha da darlaşıb.
Sabunçu Rayon İcra Hakimiyyətindən (RİH) bildirildi ki, hazırda yaşayış olan 8 mərtəbəli bina qanuni şəkildə 2017-ci ildə inşa olunub. Həmin binanın yaxınlığındaki 2 mərtəbəli yaşayış evinin üzərində isə əlavə olaraq qanunsuz 5 mərtəbə ucaldılıb. Daha sonra qanunsuz tikili sökülüb. Binanın ilk 2 mərtəbəsinə isə rəsmi çıxarış olduğundan əl vurulmayıb. Hazırda həmin ərazidə yalnız abadlıq işləri görülür. Əlavə bina tikintisi nəzərdə tutulmayıb.
Sabunçu rayon təsərrüfat şöbəsinin müdiri Elvin Mikayılov: “2023-cü ilin mart ayından söküntü işlərinə başlanılıb. Hazırda həmin ərazidə təmir-bərpa işləri həyata keçirilir. 2 mərtəbəli fərdi yaşayış evinin üzərində sonradan bir neçə mərtəbə inşa olunmuşdu ki, bu da şəhərsalma normalarına uyğun olmadığına görə RİH-nin təşəbbüsü ilə sökülmüşdü”.
Elvin Mikayılov, həmçinin bildirdi ki, həmin ərazi bərpa işlərindən sonra abadlaşdırılacaq. Ərazi RİH tərəfindən nəzarətdə saxlanılacaq.
