Bakının Sabunçu rayonu, Bakıxanov qəsəbəsi, Muxtar Fətəliyev və Aşıq Alı küçəsinin kəsişməsində köhnə ikimərtəbəli binaların sökülməsinə başlanılıb. Əksər sakinlərlə tikinti şirkəti arasında razılıq da əldə olunub. Bu haaqda bu gün, 26 oktyabr tarixində Bakuplus.az ATV Xəbər-ə istinadən məlumat verir.
Sakinlərin sözlərinə görə, yaşadıqları bina qəzalı vəziyyətə düşmüşdü və onların orada yaşaması təhlükəli idi. Razılığa görə isə tikinti şirkəti tərəfindən onların mənzillərinin sahəsindən 20 faiz artıq sahəsi olan təmirli mənzil veriləcək.
“66 ildir burada yaşayıram. Sökülüb itir ev. Kirayə haqqımı da verirlər. 20 faiz də əlavə verirlər. Sökürlər, qəşəng bina verəcəklər”, – deyə sakinlərdən biri fikrini bildirib.
Ərazidə tikinti aparan şirkətin rəhbəri Elnur Mustafayev deyir ki, sakinlərin əksəriyyəti ilə razılığa gəlinsə də, bəziləri ilə hələ də danışıqlar aparılır:
“40 kv.m qarşılığında 100 kv.m təmirli mənzil, əlavə olaraq qaraj tələb edirlər. Bəzi sakinlər gecəqondu olaraq hər hansı tikililər tikirlər – taxtadan, şiferdən tikili edir və ona görə də pul tələb edirlər. Təbii ki, şirkətin buna gücü çatmaz. Bu səbəbdən bəzi vətəndaşlarla razılıq əldə olunmayıb və danışıqlar davam edir”.
Şirkət rəhbəri deyir ki, belə sakinlərə görə söküntü və tikinti işləri də yubanır. Bu da binanın nəzərdə tutulan vaxtda təhvil verilməsinə maneə olur.
