Bakıda “Force of love” adlı festival keçiriləcək. Bu haqda bu gün, 9 may tarixində Bakuplus.az “Nargis Magazine”ə istinadən xəbər verir.
Festivalda rəsm, gülçülük, keramika üzrə dərnəklər, eləcə də digər master-klaslar təşkil olunacaq. Festival insanları birləşdirərək sevdikləri ilə keyfiyyətli vaxt keçirməyi, uşaqlar üçün bir sıra fəaliyyətlə birgə daha güclü bağlantılar qurmağı hədəfləyir.
Həmçinin Mədəni və Yaradıcı Sənayelərin İnkişaf Mərkəzi hər kəsi musiqi, rəqs, teatr, yumor, dizayn, memarlıq və digər sahələrdə öz istedadlarını nümayiş etdirməyə dəvət edir.
Tədbirin son günü isə “Komediya klubu”ndakı işləri və ŞHK-nın “Bakılı oğlanlar” komandası ilə tanınan Cavid Qurbanov, eyni zamanda rejissor, ssenari müəllifi, redaktor və “Nə? Harada? Nə zaman?” klubunun üzvü Roman Orkodaşvili da daxil olmaqla tanınmış “stand-up” artistləri səhnəyə çıxacaqlar.
Festival 17-19 may tarixlərində “Space_13” incəsənət məkanında baş tutacaq. 17 və 18 may festivala giriş ödənişsiz olacaq. 19 may tarixi üçün isə biletləri İticket.az saytından almaq mümkündür. Qiymət 45 AZN təşkil edir.
Bundan əlavə, 17 və 18 may tarixlərində festivala xüsusi avtobuslar işləyəcək. Belə ki, qonaqlar və paytaxt sakinləri saat 12:00-20:00 arası hər saat “28 May” metro stansiyasından festivala yola düşəcək avtobuslardan ödənişsiz istifadə edə biləcəklər.
