Paytaxtın Nəsimi rayonu, Azadlıq və Bakıxanov prospektlərinin kəsişməsində çəkilən avtobus zolağı yolda qəza şəraiti yaradır.
Xezerxeber.az xəbər verir ki, Azadlıq prospekti ilə hərəkət edən sürücülərin qəfil qarşılarına xüsusi zolaq çıxır. Bu zaman sürücü məcbur qalıb sol zolağa istiqamətlənir və bu da yolda hərəkət iştirakçıları üçün ciddi təhlükə yaradır.
Sürücülər deyirlər ki, hətta həmin yerdə bir neçə dəfə qəza baş verib.
Bildirilib ki, həmin ərazidə avtobus zolağı çəkilərkən yol hərəkətinin təşkilində nöqsan yaranıb. Ərazidən ilk dəfə istifadə edən sürücülər bilmədən zolağa daxil olurlar və nəticədə onlar elektron qaydada 100 manat və 2 bal ilə cərimələnirlər.
Yol hərəkəti qaydaları üzrə ekspert Yasin Mustafayev deyir ki, həmin ərazidə zolaqların fərqli olması sürücülər üçün təhlükəlidir. Ekspert də hesab edir ki, bu nöqsandır və aradan qaldırılmalıdır.
Məsələ ilə bağlı Azərbaycan Yerüstü Nəqliyyat Agentliyindən bildirilib ki, Azadlıq prospektində xüsusi hərəkət zolağı təşkil edilərkən işlər yol infrastrukturuna uyğun həyata keçirilib. Prospektin kəsişmələrində yolun eni fərqləndiyindən bu tip çətinliklər yaranır. Sürücülərə kömək etmək üçün sözügedən ərazilərdə trayektoriya xətlərinin çəkilməsi və digər tədbirlər həyata keçiriləcək.
