Bakı Apellyasiya Məhkəməsində on dörd yaşına çatmayan şəxsə qarşı əxlaqsız hərəkətlər etməkdə təqsirləndirilən Tahir Bəkirovun (adı, soyadı şərtidir) barəsindəki hökmdən dövlət ittihamçısı tərəfindən verilən apellyasiya protesti üzrə məhkəmə iclası yekunlaşıb.
Pravda.az xəbər verir ki, hakim Murad Məmmədovun sədrliyi ilə keçirilən prosesdə qərar elan olunub.
Qərara əsasən, apellyasiya protesti təmin edilib, Suraxanı Rayon Məhkəməsinin hökmü dəyişdirilib. Həmin hökmlə təqsirləndirilən şəxsin təqsirli bilindiyi Cinayət Məcəlləsinin (CM) 153.2-ci (On altı yaşına çatmayan şəxsə qarşı əxlaqsız hərəkətlər, eyni əməllər on dörd yaşına çatmayan şəxs barəsində törədildikdə) maddəsi ilə təyin edilmiş 3 il 3 ay müddətə azadlıqdan məhrumetmə cəzasının müddəti 2 ilə endirilib. Hökmdən CM-in 70-ci (şərti) maddəsinin tətbiqi ilə bağlı müddəalar xaric edilib və Tahir Bəkirov məhkəmə iclas zalından dərhal həbs olunub.
İttihama görə, hadisə 14 iyul 2024-cü il tarixdə saat 22 radələrində Bakı şəhəri, Suraxanı rayonu, Hövsan qəsəbəsində qeydə alınıb.
Belə ki, 2007-ci il təvəllüdlü Tahir Bəkirov həmin ərazidəki yolun kənarında on dörd yaşına çatmayan - 2013-cü il təvəllüdlü S.S.-nə (adı, soyadı şərtidir) qarşı əxlaqsız hərəkətlər edib.
