Bakı şəhəri Yasamal rayonu ərazisində yeni parkın salınması məqsədilə ətraf mühitin abadlaşdırılması və köhnə tikililərin sökülməsi işlərinə start veriləcəyi barədə məlumatlar yayılmaqdadır.
Bakuplus.az xəbər verir ki, növbəti söküntü işlərinin Mərkəzi Parkın davamı olaraq aparılacağı, bu layihənin S.Tağızadə, A.Şaiq və N.Aşurbəyova küçələrini əhatə edəcəyi bildirilir. Həmçinin söküntü işlərinə keçmiş “Sovetski”nin (yaxud Bayırşəhər) bir sıra başqa ərazilərinin də daxil olacağı deyilir.
Bu isə şəhərin tarixi mərkəzinin ayrılmaz hissəsi olan bəzi ərazilərin də plana düşməsi deməkdir. Ancaq Bakının Baş planında tarixi mərkəzin qorunacağı vəd edilir. Sosial şəbəkələrdə isə sözügedən ərazilərdə artıq ölçmə işlərinin başlandığı bildirilib.
Məlumata görə, Nizami, Süleyman Tağızadə, Lev Tolstoy, Mirzə Fətəli Axundzadə, Rza Quliyev, Murtuza Muxtarov, Zərgərpalan, Əlövsət Quliyev, Bəşir Səfəroğlu, Molla Vəli Vidadi, Çingiz Mustafayev, Abdulla Şaiq, Səid Rüstəmov və Nabat Aşurbəyova küçələrinin əhatə etdiyi tarixi məhəllələrin sökülməsi nəzərdə tutulur.
Buradakı evlərin kvadratına görə 3000 və 2200 manat kompensasiya təklif olunduğu iddia edilir.
Məsələ ilə bağlı Dövlət Şəhərsalma və Arxitektura Komitəsinə sorğu göndərdik. Ancaq sorğumuza heç bir cavab verilmədi.
Sevinc
