Bakıda avtobusların sürət həddi azaldılıb. Bu haqda bu gün, 8 iyun tarixində Bakuplus.az Xəzər Xəbərə istinadən məlumat verir.
“BakuBus” avtobuslarının sürət həddi endirilib. Bu da güclü gecikmələrə səbəb olub.
“1-2 saat yol gedirik. Əvvəl yaxşı idi, sürətli sürürdülər. Son vaxtlar ləngimələr çox olur”, – deyə sərnişinlər bildirirlər.
Məsələdən sürücülər də narazıdırlar. Onların sözlərinə görə, bu sürət həddi ilə avtobus idarə etmək çox çətindir:
“40-45 dəqiqəlik yola 1 saatdan çox vaxt sərf edirik. Həm də magistral yolda aşağı sürətlə manevr etmək çətindir”, – deyə onlar qeyd ediblər.
Qurumdan məsələ ilə bağlı vurğulanıb ki, sürət həddinin azaldılması qəzalarla bağlıdır:
“Yeni qərar qəzaların sayını 40%-ə qədər azaldıb. Hazırda xüsusi avtobus zolaqlarının genişləndirilməsi üzrə işlər davam etdirilir. Bu xətlər düzələndən sonra sürət həddində tənzimləmələr olacaq”, – deyə qurumdan qeyd olunub.
Hazırda sürət həddi şəhərlərarası 90 km/s, Sumqayıt və Hava Limanı ekspres xətlərində 70 km/s, 149 marşrut xəttində 60 km/s, digər xətlərdə isə 50 km/s təşkil edir.
