Sabunçu rayonu, Balaxanı qəsəbəsi, 2-ci mədən adlanan ərazidə yaşayış binası qəzalı vəziyyətdədir. Bu haqda bu gün, 25 aprel tarixində Bakuplus.az ATV-yə istinadən xəbər verir.
18 ailənin yaşadığı 126 yaşlı binanın tavan hissəsində iri çökmələr, divarlarında çatlar əmələ gəlib. Bəzi sakinlər həyati təhlükədən qorxaraq evlərini qoyub kirayə mənzillərə köçüblər. Digərləri isə təhlükə altında yaşamağa davam edirlər.
73 saylı mənzil istismar sahəsinin rəisi Əliabbas Cəbrayılov deyir ki, bina öncə Dövlət Neft Şirkətinin balansında olub, 2012-ci ildən sonra isə qəzalı vəziyyətdə mənzil kommunal təsərrüfat birliyinin balansına verilib.
“Binanın qəzalı olması barədə akt olmadığı üçün bina tərəfimizdən aktı olmayan, lakin qəzalı hesab olunan binalar siyahısına salınıb. Belə binaların sayı çox olduğu üçün növbəli şəkildə tədbirlər görülür. Yaxın vaxtlarda tərəfimizdən FHN-ə müraciət olunacaq. FHN-dən rəy veriləndən dərhal sonra sakinlərin ərazidən köçürülməsinə başlanılacaq”, – deyə o əlavə edib.
