Sabunçu rayonu, Balaxanı qəsəbəsi, Neftçilər küçəsi, 2-ci mədəndə yaşayan sakinlər yollarının pis vəziyyətdə olmasını və illərdir bu yolda hərəkət etməkdə çətinlik çəkdiklərini deyirlər. Yolun üzərində dərin çuxurlar, dolu gölməçələrdən keçən avtomobillərin detalları yararsız hala düşür. Bu haqda bu gün, 13 yanvar tarixində Bakuplus.az Real TV-yə istinadən məlumat verir.
Şikayətçi Məhər Qasımov 1-ci qrup əlil övladını yol palçıqlı olduğuna görə çölə çıxara bilmədiyini deyir. Yolların palçıqlı halda olması səbəbindən sakinlər hər həftə bir ayaqqabı aldıqlarını bildirirlər. Şikayətçilər taksi və Təcili Tibbi Yardım maşınlarının kilometrlərlə uzaqda saxladıqlarını, bu yola girməkdən imtina etdiklərini deyirlər.
Sözügedən əraziyə dəfələrlə aidiyyəti qurumlar tərəfindən baxış keçirilsə də, heç bir tədbir görülməyib. İllərdir ki, yay-qış yoldan istifadə edə bilməyən Neftçilər küçəsinin sakinləri artıq bu durumdan təngə gəldiklərini deyirlər.
Balaxanı qəsəbə İcra Nümayəndəliyindən bildirildi ki, Sabunçu rayonu, Balaxanı qəsəbəsi, Neftçilər küçəsində yolun təmiri ilə bağlı bütün qəsəbələrdə olduğu kimi, Balaxanı qəsəbəsində də aidiyyəti üzrə AAYDA tərəfindən Dövlət İnvestisiya Proqramları çərçivəsində mərhələli şəkildə həyata keçirilir. Qeyd olunan məsələnin yaxın zamanlarda öz həllini tapacağı bildirilib.
