Sabunçu rayonunun Balaxanı qəsəbəsinin sakinləri marşrut avtobuslarında üzləşdikləri çətinliklərdən şikayətçidirlər.
Sakinlər “Xəzər xəbər”ə bildiriblər ki, Balaxanı qəsəbəsindən 8-ci kilometr bazarı, eləcə də əks istiqamətdə işləyən 105 saylı marşrut avtobusları onları yarı yolda qoyur, sıxlıq həddindən artıqdır. Sürücülər isə əksini iddia edirlər.
Məsələ ilə bağlı Azərbaycan Yerüstü Nəqliyyat Agentliyindən (AYNA) bildirilib ki, 105 nömrəli marşrut xətti müvəqqəti olaraq "Azlənd Plaza" MMC-nin istismarındadır. Bu marşrut xətti üzrə 16 avtobus 10 dəqiqəlik hərəkət intervalı ilə sərnişinlərə xidmət göstərir. Agentlikdən o da qeyd edilib ki, sözügedən marşrut xətti üzrə daşıyıcıya avtobus sayının sərnişin tələbatına uyğun olaraq tənzimlənməsi barədə tapşırıq verilib.
