Bakının Səbail rayonu, Bayıl qəsəbəsində keçən əsrin əvvəlində tikilən bina sökülüb. Bu haqda bu gün, 4 dekabr tarixində Bakuplus.az “EcoKönüllü” Facebook səhifəsinə istinadən məlumat verir.
Verilən məlumata görə, ilk dəfə olaraq binanın cari ilin avqust ayında sökülməsinə cəhd edilib, lakin sakinlər tikilini qoruya biliblər.
Həmin binanın fasadının üzərində tikili ilə bağlı məlumat lövhəsi də var idi, orada tikinti vaxtı və bu binanın nə üçün tarixi əhəmiyyət kəsb etdiyi haqda məlumat verilmişdi. Bildirilir ki, həmin ərazidə olan irigövdəli ağaclar da kəsilib.
Məsələ ilə bağlı Mədəni İrsin Qorunması, İnkişafı və Bərpası üzrə Dövlət Xidmətindən bildirilib ki, sözügedən bina tarixi abidə kimi reyestrdə dövlət qeydiyyatında deyil.
