Səbail rayonu, Bayıl qəsəbəsində yeni tikinti köhnə evə ciddi ziyan vurur. Bu haqda bu gün, 13 oktyabr tarixində Bakuplus.az ATV-yə istinadən xəbər verir.
Söhbət Neftçi Qurban küçəsi, 104 ünvanında yerləşən binadan gedir. Şikayətçinin sözlərinə görə, onun yaşadığı evin yanında yeni binanın tikintisinə başlanılıb. Bu da evə ciddi ziyan vurur.
“İstinad divarlarımız ortaqdır. Əgər bu divarı götürərsə, mənim evim uçur, tavan gedir. Boyaboy evimin bir tərəfi uçub dağılır”, – deyə şikayətçi Araz Məmmədov qeyd edib.
A.Məmmədov tikinti işlərini aparan şəxsə müraciət etdiyini, ancaq razılaşmaya gələ bilmədiyini bildirir.
“Hazırda evin bərpasının 20-30 min arası xərci var. Dedim ki, mənə dəymiş zərəri ödəsin. Ondan sonra da 3 metr aralıda inşaatını aparsın. Dedi ki, elə bir şey ola bilməz, 1 metr aralıda tikəcək, o da hələ sual altındadır”.
Söküntü işlərini aparan Anar Məhərrəmov isə öz növbəsində məsələ ilə bağlı fikir bildirib.
“İkimizin arasındakı ortaq divarı əgər razılıq olarsa, təmamilə mənim hesabıma tam bərpa edəcəyəm. Mən bunu ona təklif etmişəm. Dedim, əgər razı olmasa, həmin bünövrə üzərində mən özüm üçün ayrıca divar inşa edəcəyəm”, – deyə iş icraçısı qeyd edib.
