Heyvan hüquqlarının müdafiəçisi Fərid Mansurov Bakıda itini mütəmadi olaraq vəhşicəsinə döyən qadının şəxsiyyətini açıqlayıb. Bu haqda bu gün, 2 fevral tarixində Bakuplus.az məlumat verir.
Xaski itinə işgəncə verən qadının adı Sevinc Əmirovadır. 31 yanvar tarixində onun barəsində “heyvanlarla rəhmsiz rəftar edilməsi” maddəsi üzrə protokol tərtib edilib və həmin şəxs 500 manat məbləğində cərimələnib.
Mansurov qeyd edir ki, bu gün saat 15:00-da Binəqədi RPİ-nin 6-cı Polis Bölməsinin qarşısında ictimai fəallar toplaşacaqlar və Daxili İşlər Nazirliyindən itkin itin tapılmasında kömək istəyəcəklər. İtin harada olduğu hələlik məlum deyil.
Həmçinin qeyd olunur ki, Əmirova kirayədə yaşadığı və itinə işgəncə verdiyi mənzildən köçüb.
