Paytaxtın Xəzər rayonu, Binə qəsəbəsi, Südçülük sovxozunda bir neçə ailənin evləri digər şəxslər tərəfindən mənimsənilib. Bu haqda bu gün, 10 yanvar tarixində Bakuplus.az ATV Xəbər-ə istinadən məlumat verir.
Şikayətçi Rafiq İbrahimov deyir ki, valideynləri 2000-ci ildə sovxozda işləyərkən Südçülük sovxozunda 4 sot torpaq onların payına düşüb. 2021-ci ildə isə özü həmin torpaqda 2 otaqlı ev tikib və 2 ildir orada yaşayır.
“Ayın 18-də getmişdim mağazaya, qonşular zəng elədilər ki, “tez gəl, evi dağıdırlar”. Mən də gəlib gördüm ki, qapını qırıblar, evdə 7-8 nəfər adam var. Soruşdum: “Nə olub, niyə belə edirsiniz?” Dedilər: “Ev bizimdir, biz tikmişik”, – deyə kişi danışıb.
Rafiq İbrahimovun evinə qanunsuz sahibləndiyi iddia olunan və özünü təqdim etməkdən imtina edən şəxs iddiaların əsassız olduğunu bildirib. Əksinə, o, 5 ay burada olmadıqlarından istifadə edərək qarşı tərəfin hazır tikilinin sadəcə üstünü düzəltdirərək əmlakı mənimsəmək istədiyini bildirib. Lakin həmin şəxs torpağın və evin ona məxsus olduğunu təsdiqləyən sənədi təqdim etməkdən imtina edib.
Rafiq İbrahimovla qonşu olan bir neçə vətəndaş da eyni problem yaşadığını deyir. Bildirilir ki, Seymur və Coşqun adlı şəxslərdən bir neçə il əvvəl etibarnamə sənədi əsasında torpaq alıblar. Lakin indi həmin şəxslər tikilən evlərə girərək sakinlərdən torpağa görə pul tələb edirlər.
Suraxanı Rayon İcra Hakimiyyətinin rəsmisi Qurbanəli İslamov məsələnin həllini məhkəmədə görür: “Hüseyn adlı şəxs bizə müraciət etmişdi. Kənd təsərrüfatı təyinatlı çıxarışla gəlmişdi ki, onun yerimi zəbt edirlər. Mülki məsələ olduğuna görə Suraxanı Rayon Məhkəməsinə müraciət etməsini məsləhət gördük”.
Hüquqşünas Cabbar Bayramov deyir ki, verilən etibarnamə istənilən vaxt ləğv edilə bilər. Bu mübahisəyə gəlincə o bildirib: “Etibarnaməni vermə müqabilində hər hansı vəsait alınıbsa, etibar olunan şəxsdən həmin etibarnamə ləğv olunursa, bu artıq aldatma hesab olunur və dələduzluq cinayətinin tərkibini yarada bilər”.
