Bakının Xəzər rayonu, Binə qəsəbəsinin ərazisində axan Abşeron su kanalı məişət tullantıları ilə “zəhərlənib”. Bu haqda Space TV reportaj hazırlayıb.
İllər öncə sakinlər bu kanalın suyundan istifadə ediblər. Amma hazırda kanal cürbəcür tullantılar, plastik butulkalar, içi dolu zibil kisələri ilə doludur. Məişət tullantıları sakinlər tərəfindən su kanalına atılır. Nəticədə kanalın suyu çirklənir, tullantılar isə axının qarşısını alır.
Yerli sakinlər iddia edir ki, kanal artıq 10 ildir bu vəziyyətdə qalır. Qəsəbə ərazisində zibil qutuları olmadığına görə sakinlər tullantıları kanala atmağa məcburdurlar.
Məsələ ilə bağlı Binə bələdiyyəsinin sədri Habil Həmidov vəziyyətdən xəbərdar olduğunu bildirib: “Bununla bağlı biz sukanal idarəsinə müraciət etmişik, həmin kanalın təmizlənməsi ilə bağlı onlar tərəfindən tədbir görülür. Hal-hazırda Maştağa qəsəbəsindən başlayaraq kanalda təmizlik aparılır. Yəni kanalın dənizə çatan hissəsinə qədər işlər icra olunur. Biz bu məsələni nəzarətdə saxlayacağıq və məsələ öz həllini tapacaq”.
Bələdiyyə sədri həmin ərazidə qısa zamanda iməcilik işlərinin aparılacağını və problemin tez bir zamanda aradan qaldırılacağını vəd edib.
[caption id="attachment_37212" align="alignnone" width="800"] Foto Space TV[/caption]
