Bakıda itini mütəmadi olaraq vəhşicəsinə döyən qadın 500 manat məbləğində cərimələnib. Bu haqda bu gün, 1 fevral tarixində Bakuplus.az məlumat verir.
Daxili İşlər Nazirliyinin mətbuat xidmətindən məlumat verilib ki, videogörüntüdə iti döyən şəxs müəyyən olunub, onun barəsində “heyvanlarla rəhmsiz rəftar edilməsi” maddəsi üzrə protokol tərtib edilib və həmin şəxs 500 manat məbləğində cərimələnib.
Buna baxmayaraq, ictimai fəallar və heyvansevərlər sabah saat 12:00-da Binəqədi RPİ-nin 6-cı Polis Bölməsinin qarşısında toplaşacaqlar.
Heyvan hüquqlarının müdafiəçisi Fərid Mansurov öz Facebook səhifəsində bildirir ki, həmin xaski cinsli it yoxa çıxıb. Ötən gün hadisə yerinə cəlb olunan sahə rəisi bildirib ki, it “Toplan” qayğı mərkəzinə göndərilib. Hüquq müdafiəçiləri “Toplan”ın belə məsələlərlə məşğul olmadığını izah ediblər. Bir müddət sonra o, itin Heyvanları Mühafizə Cəmiyyətindən götürüldüyünü bildirib. Lakin itin heç bir sığınacağa getməməsi toplaşan vətəndaşlar arasında narazılıq və çaşqınlıq yaradıb.
İtin yerini öyrənmək üçün hüquq müdafiəçiləri yenidən polisə müraciət etməyi və dəqiq cavab almağı planlaşdırırlar.
