Bakının Xəzər rayonu, Binə qəsəbəsində yaşayan sakinlər uzun müddətdir ki, içməli su problemindən əziyyət çəkirlər. Bu haqda bu gün, 24 iyun tarixində Bakuplus.az Baku TV-yə istinadən xəbər verir.
Bəhram və İman qardaşları küçəsində vətəndaşlar 10 ildən çoxdur ki, içməli suya həsrət qalıblar. Sakinlərin sözlərinə görə, əraziyə, hətta su xətləri çəkilməyib. Susuz qalan vətəndaşlar məcburiyyət qarşısında quyu qazıblar, lakin bu da kömək etməyib.
“Ayda 4 dəfə su maşını çağırırıq. Suyu 35 manata gətirirlər. Hər ay hər bir ailə 140-150 manat suya pul verir. Bütün ağaclarımız quruyub”, – deyə sakinlər şikayət edirlər.
Əlavə olaraq, sakinlər yolsuzluqdan da əziyyət çəkirlər. Bu səbəbdən vətəndaşlar öz hesablarına çınqıl alıb töküblər.
“Azərsu” ASC-dən bildirilib ki, gələcəkdə həmin ərazilərdə mərhələli şəkildə içməli su şəbəkəsinin yaradılması nəzərdə tutulub.
Yol məsələsi ilə bağlı isə Xəzər Rayon İcra Hakimiyyətindən deyildi ki, artıq Azərbaycan Avtomobil Yolları Dövlət Agentliyinə (AAYDA) rəsmi müraciət ünvanlanıb.
AAYDA-nın sözçüsü Anar Nəcəflinin sözlərinə görə, agentlik öz balansında olan avtomobil yollarına, küçə və prospektlərə xidmət göstərir. Həmin yollar isə agentliyin balansında deyil.
“Yalnız investisiya proqramları çərçivəsində sözügedən ərazilərdə təmir işləri icra oluna bilər. Bununla bağlı aidiyyəti üzrə müraciət ünvanlanmalıdır ki, investisiya proqramına daxil edilsin. Artıq investisiya proqramına daxil ediləndən sonra onun təmiri AAYDA-ya həvalə ediləcək”, - deyə A. Nəcəfli qeyd edib.
