28 may 1918-ci ildə Azərbaycanda İstiqlal Bəyannaməsi qəbul edildi və müsəlman Şərqinin ilk demokratik, hüquqi, dünyəvi və parlamentli respublikası yaradıldı. Bəyənnamə Tiflis şəhərində Məhəmməd Əmin Rəsulzadənin başçılıq etdiyi Azərbaycan Milli Şurasının iştirakı ilə elan olundu. Bu Şuraya Fətəli xan Xoyski, Xəlil bəy Xasməmmədov, Nəsib bəy Yusifbəyli, Mehdi bəy Hacınski, Firudin bəy Köçərli kimi maarifçilər daxil idilər.
Hələ XIX əsrin ikinci yarısından Azərbaycanda milli dirçəliş hərəkatı başlamış, XX əsrin əvvəllərində bu hərəkat daha da genişlənmişdir. 1917-ci ildə baş vermiş Oktyabr inqilabı, rus-çar imperiyasının dağılması Azərbaycanın istiqlaliyyətinin elan edilməsi və Xalq Cümhuriyyətinin yaradılması üçün şərait yaratdı.
1990-cı ildən 28 May dövlət səviyyəsində Respublika Günü kimi qeyd edilirdi. 15 oktyabr 2021-ci ildən Respublika Gününün adı dəyişdirilərək Müstəqillik Günü olmuşdur.
25 may 2007-ci ildə Bakıda bu tarixi əks etdirən “İstiqlal bəyannaməsi” abidəsinin açılışı baş tutdu. Abidə Səbail rayonu ərazisində, İstiqlaliyyət küçəsində, AMEA Əlyazmalar İnstitutu ilə Azərbaycan Dövlət İqtisad Universitetinin arasındakı ərazidə yerləşir.
