Azərbaycanda yaradıcı həftəsonu elan olunur. Bu haqda bu gün, 31 may tarixində Bakuplus.az APA-ya istinadən xəbər verir.
Bu gündən etibarən 3 iyun tarixinə qədər Rəqəmsal Yaradıcı Həftəsonu (Digital Creative Week) çərçivəsində genişmiqyaslı oyun festivalı – “Gamesummit 2024”, ICESCO-nun “A-Hub Akselerasiya Proqramı”nın (2023-cü il üzrə) dünya finalı təşkil ediləcək.
Bakı Kristal Zalında dünyaca məşhur pop musiqiçisi Con Nyumanın açılış konserti ilə başlayacaq oyun sammiti festival, performans və oyun konfransı olmaqla 3 hissədən ibarət olacaq və 3500-dən çox kompüter oyunu həvəskarlarını, oyun tərtibatçılarını və şirkətləri, icmaları, İT startapları, eləcə də müxtəlif dövlət qurumlarının nümayəndələrini bir araya gətirəcək.
Ziyarətçilərə müxtəlif interaktiv əyləncələr – arkad maşınları, VR zonası və müstəqil yerli tərtibatçıların oyunlarının nümayişi baş tutacaq. Sammitdə “e-Sports” kateqoriyası üzrə müxtəlif yarışmalar, “Cosplay” (xüsusi personajların həvəskar şəxslər tərəfindən təmsil və nümayiş etdirilməsi), “K-pop” (Koreya pop musiqisi) rəqsləri və musiqili çıxışlar, həmçinin “AzDimension” studiyası tərəfindən həmin günədək elan olunmamış oyunlar təqdim olunacaq.
