Bakıda taksi sürücülərindən biri avtomobilin üzərinə elan yapışdırıb ki, avtomobildə kondisioneri işə salmaq üçün sərnişin əlavə pul ödəməlidir. Bununla bağlı müvafiq görüntülər sosial şəbəkələrdə yayılıb. Bu haqda bu gün, 17 iyul tarixində Bakuplus.az Oxu.az-a istinadən məlumat verir.
Azərbaycan Yerüstü Nəqliyyat Agentliyindən (AYNA) məsələ ilə əlaqədar sorğuya cavab olaraq bildirilib ki, agentliyə daxil olan bu cür müraciətlər araşdırılır.
“Sərnişinlərə taksi sahəsində qarşılaşdıqları müxtəlif problemlərlə, o cümlədən kondisionerin işlədilməsinə görə əlavə pul tələb edilməsi ilə bağlı AYNA-nın "141" Çağrı Mərkəzi və ya sosial şəbəkə hesabları üzərindən müraciət etmələri və nəqliyyat vasitəsinin dövlət qeydiyyat nişanı barədə məlumat vermələri xahiş olunur.
Taksi nəqliyyat vasitəsi ilə sərnişin daşımalarında xidmət keyfiyyəti ilə bağlı sərnişinlərdən daxil olan müraciətlər AYNA tərəfindən araşdırılır və neqativ halların qarşısının alınması üçün tədbirlər görülür. Qanunvericiliyin tələblərini yerinə yetirməyən sürücülərin icazələri ləğv ediləcək.
Qeyd edək ki, son bir həftə ərzində tələbləri pozan 23 taksi sürücüsü sistemdə bloklanıb”, – deyə agentlikdən bildirilib.
