Xəzər rayonu, Şağan qəsəbəsi, “Yeni sahə” adlanan ərazidə yaşayan sakinlərin vəziyyəti acınacaqlıdır. Evlərinin zirzəmiləri su ilə dolan və antisanitariyadan əziyyət çəkən sakinlər mövcud vəziyyətdən narazıdırlar. Bu haqda bu gün, 30 may tarixində Bakuplus.az BakuTV-yə istinadən məlumat verir.
“Bilmirik, burada böyütdüyümüz uşaqlar gələcəkdə hansı xəstəliyə tutulacaqlar”, - deyə sakinlər gələcəkdən narahatlıqlarını bildirirlər.
Sakinlər, həmçinin içməli su xətlərinin və ərazidə zibil qutularının olmamasından şikayət edirlər.
Onlar aidiyyəti qurumlara dəfələrlə müraciət etmələrinə baxmayaraq, problemin həlli istiqamətində addım atılmadığını deyirlər.
Məsələ ilə bağlı Xəzər rayon İcra Hakimiyyətinin (RİH) Şağan qəsəbəsindəki inizabati ərazi dairəsi üzrə nüamyəndəliyinin rəsmisi Tərlan Dadaşov müsahibə verməkdən imtina edib.
Qurumun rəsmisi məsələ ilə bağlı yazılı şəkildə mövqeyini bildirib. O qeyd edib ki, sutəmizləyici qurğuların, anbarların, nasos stansiyalarının, su kəmərlərinin, kanalizasiya kollektorlarının layihələndirilməsi, inşası, istismarı və onlara texniki xidmət göstərilməsi “Azərsu” ASC tərəfindən həyata keçirilir. Xəzər RİH tərəfindən sözügedən quruma müraciət ünvanlanıb.
“Azərsu” ASC-nin sözçüsü Anar Cəbrayıllı isə bildirdi ki, Şağanın Yeni Sahə ərazisinin bir qismində su xətti yoxdur, bir qismində vətəndaşlar tərəfindən normalara cavab verməyən kustar üsulla fərdi şəbəkə çəkilib. Havalar isinəndə, suya da tələbat artanda isə müəyyən evlərdə problemlər yaranır. Həmçinin ərazidə, ümumiyyətlə, kanalizasiya infrastrukturu mövcud deyil. Amma master planına əsasən, gələcəkdə bütün qəsəbələrdə olduğu kimi, həmin ərazidə də mərkəzləşdirilmiş su və kanalizasiya infrastrukturu planlaşdırılır.
