Yasamalın bəzi yarımtikililəri, tərk olunmuş əraziləri narkomanların məskəninə çevrilib. Orada onlar özləri üçün şərait yaradıb, mütəmadi olaraq orada qalırlar. Bu haqda bu gün, 9 iyul tarixində Bakuplus.az ARB Xəbər-ə istinadən məlumat verir.
İlqar İsmayılov küçəsində olan söküntüdən sonra qalan boş ərazi, Zivər bəy Əhmədbəyov, 10 ünvanında yerləşən yarımçıq tikilmiş bina belə ərazilərdən bəziləridir. İctimai yerlərə kifayət qədər yaxın olan narkoman yuvaları yerə səpələnmiş çoxlu sayda istifadə edilmiş şprislərlə seçilir.
Bu ərazilərdə narkotik istifadəçilərinin rahat hərəkət etməsi insanlar üçün də real təhlükədir. Bu təhlükənin qarşısını almaq isə təbii ki, polis əməkdaşlarının üzərinə düşür.
Daxili İşlər Nazirliyindən (DİN) deyildi ki, narkotiklərin qanunsuz dövriyyəsinə qarşı çəkiliş aparıldığı hər 2 ünvan daxil olmaqla ümumilikdə Yasamal rayonun ərazisində mütəmadi olaraq əməliyyatlar aparılır.
“Təkcə may, iyun aylarında Yasamal rayonunda əməkdaşlarımızın keçirdikləri tədbirlərlə narkotiklərin qanunsuz dövriyyəsi və satışı ilə bağlı 120 fakt aşkar edilib. Adıçəkilən ərazilərdə əməkdaşlarımız tərəfindən nəzarət-profilaktik tədbirlər mütəmadi olaraq davam etdirilir. Narkotiklərin qanunsuz dövriyyəsinin qarşını almaq üçün həmin ərazidə polis naryadları tərəfindən fasiləsiz xidmət təşkil olunub”, – deyə DİN-in mətbuat xidmətinin baş inspektoru Elbrus İsmayılov bildirib.
