Dəniz qırağında divarlar çəkilir, şlaqbaumlar quyulur – hər yay mövsümü Bakı sakinləri bu maneələrlə rastlaşırlar. Bu çimərlik mövsümü də yeni zəbtlərlə başlayıb. Bu haqda bu gün, 22 iyun tarixində Bakuplus.az Xəzər Xəbər-ə istinadən məlumat verir.
Belə ki, Buzovna qəsəbəsində boş ərazi bu il də hasarlanıb, şlaqbaumun yanında duran şəxs sürücülərdən pul tələb edir. Onun sözlərinə görə, pul verən heç yoxdur, vətəndaşlar tələblərlə razılaşmırlar. Ot-alaqla dolu ərazidə nə sanitar qovşağı, nə də geyinmə otağı var. Burada zibil qutuları da qoyulmayıb.
Bir neçə gün əvvəl Bilgəhdəki Kardioloji sanatoriya qalmaqalla üzləşib: orada iki şlaqbaum qoyularaq vətəndaşlardan pul yığılır. İstirahətə gələnlərin sözlərinə görə, hər avtomobildən 2-3 manat pul tələb olunur. Piyada gələnlərdən isə pul tələb olunmur.
Obyektin nəzərətçisi vətəndaşların iddiasına belə aydınlıq gətirib: “Parkinq üçün ödəniş 2 manatdır. Dənizə isə giriş pulsuzdur. Yığılan pul isə təmizlik üçün xərclənir”.
Bakı şəhər İcra Hakimiyyətindən bildirildi ki, bu kimi halların qarşısını almaq üçün çimərliklərdə mütəmadi olaraq monitorinq aparılır. Davamlı olaraq nəzərət tədbirləri gücləndirilir.
