Dövlət İmtahan Mərkəzi (DİM) 19 fevral tarixində ali təhsil müəssisələrinin və Azərbaycan Milli Elmlər Akademiyasının (AMEA) magistraturalarına qəbul imtahanı keçirəcək. Bu haqda bu gün, 16 fevral tarixində Report məlumat verib.
DİM-dən verilən məlumata görə, imtahanlar respublikanın 7 şəhər və rayonunda - Bakı, Sumqayıt, Abşeron, Naxçıvan, Gəncə, Mingəçevir və Lənkəran şəhərlərində aparılacaq.
Bakıda imtahanda 13.635 bakalavrın iştirak edəcəyi gözlənilir. İmtahanlar paytaxt ərazisində 51 müxtəlif yerdə keçiriləcək.
İmtahanlar saat 11:00-da başlayır. Saat 10:45-də, imtahanların başlanmasına 15 dəqiqə qalmış imtahan binalarına buraxılış dayandırılacaq.
Bakalavrlar imtahana gələrkən aşağıda göstərilən sənədləri mütləq özləri ilə gətirməlidirlər:
- Şəxsiyyəti təsdiqləyən sənədin əsli;
- “İmtahana buraxılış vərəqəsi”.
Əks halda vətəndaşlar imtahana buraxılmayacaqlar.
