Səbail rayonu, Süleyman Məlikov və Neftçi Qurban (keçmiş Xanlar və Qurban Abbasov) küçələri arasında yerləşən 19-cu əsrə aid bina sökülür. Bu haqda bu gün, 18 oktyabr tarixində Bakuplus.az APA TV-yə istinadən məlumat verir.
Tarixi-mədəniyyət nümunəsinin ətrafında aparılan söküntü işləri həm tarixi binaya, həm də fərdi yaşayış evlərinə ziyan vurur.
Sahədə olan iki nəfər ilk olaraq özünü fəhlə kimi təqdim edib, lakin onlar hər hansı suala cavab verməkdən imtina ediblər. Daha sonra məlum olub ki, həmin şəxslər söküntü işlərinin icraçılarıdır.
Ərazidə ən çox Araz Məmmədov adlı şəxsin evi deformasiyaya uğrayıb. Hər nə qədər tikinti şirkətinin rəhbəri bu ziyanı ödəyəcəyi ilə bağlı vəd versə də, bunu reallaşdırmayıb. Elə bu səbəbdən də Araz Məmmədov hüquq-mühafizə orqanlarına müraciət etməli olub.
Sakinlər deyirlər ki, bina hasarlananda onları aldadıblar ki, restavrasiya olunacaq. Ancaq sonra binanı sökməyə başlayıblar. Şikayətlərdən sonra işi dayandırıblar. Bir müddət sonra isə tarixi bina bu vəziyyətə düşüb.
Bununla yanaşı, ərazini əhatə edən hasar taxtalarla yaxınlıqda olan ağaclara mismarlanıb. Nəticədə ətraf mühitə də ziyan dəyib.
Məsələ ilə bağlı Mədəniyyət Nazirliyindən mövqe öyrənmək mümkün olmayıb.
