Bakıda 77 saylı marşrut avtobusunda sərnişinlərlə dispetçer və sürücü arasında münaqişə baş verib. Müvafiq görüntülər sosial şəbəkələrdə yayılıb. Bu haqda bu gün, 29 iyul tarixində Bakuplus.az Oxu.az-a istinadən məlumat verir.
Qəzəblənən sərnişinlərdən biri bildirib ki, havanın yağışlı olmasına baxmayaraq, 77 saylı avtobus 45 dəqiqə sürücüsüz kafelərdən birinin qarşısında dayanıb.
"45 dəqiqə sonra sürücü ilə birlikdə gələn dispetçer içkili olduğundan avtobusun gecikməsinə etiraz edən sərnişinlərlə mübahisə etməyə başlayıb. Dayanacaqların birində dispetçer mübahisə edən sərnişinlərin biri ilə avtobusdan düşüb əlbəyaxa dava etməyə cəhd göstərsə də, onları ayırıblar. Bu zaman sürücü də avtobusdan düşüb, həmin o etiraz edən sərnişinlə mübahisə etməyə başlayıb", - şikayətçilər bildiriblər.
Məsələ ilə bağlı daşıyıcı şirkət olan ““Xaliq Faiqoğlu”nun nümayəndəsi bidirib ki, baş vermiş hadisədə sürücünün günahı olmayıb.
"Məlum olub ki, həmin vaxt 77 saylı xətt üzrə avtobuslarının qrafikində gecikmə müşahidə edilib. Bu zaman avtobus dayanacağa yaxınlaşarkən sərxoş halda olan sərnişinlərdən biri dispetçeri təhqir edərək, nəqliyyat vasitəsinə daxil olub. Dispetçer də onu söyən şəxsi avtobusdan endirməyə çalışıb", - deyə şirkətdən fikir bildiriblər.
