Evlər kirayə verilən zaman müqaviləyə ehtiyac varmı? Bu haqda bu gün, 11 dekabr tarixində Bakuplus.az ATV-yə istinadən xəbər verir.
Bakıda əksər hallarda ev sahibləri və kirayəçilər arasında müqavilə bağlanmır. Bu səbəbdən də tez-tez onların arasında narazılıqlar yaranır və mübahisələr yaşanır.
Əmlak üzrə ekspert Elnur Fərzəliyevin sözlərinə görə, notarial qaydada bağlanan bütün müqavilələrdə kirayə götürənin və verənin bütün öhdəlikləri qeyd olunur. Əgər bir şəxs mənzili kirayə götürərsə və evi təhvil verən zaman əşyalara hər hansı bir ziyan dəyərsə, müqaviləyə əsasən, təbii ki, dəymiş bütün zərər birmənalı olaraq ödəməlidir.
Kirayə müqaviləsiz olduğu təqdirdə hər 2 tərəf üçün bir sıra problemlər ortaya çıxır. Məsələn ev sahibi mənzilin qiymətini tez-tez qaldırır və ya ev sahibi evin hansısa əşyasının, guya itməsi və evin təmirinin korlandığına görə kirayəçidən təzminat tələb edir.
Digər problem isə internet vasitəsilə dələduzluq edilməsidir.
“Elan saytlarına verilən ucuz mənzillərin böyük əksəriyyəti feyk elanlardır ki, bunlar daha çox fırıldaqçılar tərəfindən elan saytlarına yerləşdirilir. Verilən beh belə müqavilə formasında aparılmalıdır ki, daha sonra bu tip problemlər baş verməsin”, – deyə ekspert Elnur Fərzəliyev bildirib.
Həmçinin əmlakını müqaviləsiz kirayə verən şəxslər mənzildə törədilə biləcək hər hansı cinayət işinə görə də məsuliyyət daşıyırlar. Kirayə müqaviləsinin bağlanması hər iki tərəfin öz hüquqlarını qoruması üçün yeganə təsdiqli razılaşmadır.
Hüquqşünas Rəşad Əliyev isə müqavilələrdən qaçmağın əsas səbəbinin vergidən yayınmağın olduğunu bildirib. Ev sahibi kirayə müqaviləsindən əldə etdiyi gəlirdən 14% vergi verməlidir ki, bu da tərəflərin aralarında razılaşmasına sövq edir.
