Facebook sosial şəbəkəsində polis strukturunun saxta hesabı yaradılıb. Bu haqda bu gün, 31 yanvar tarixində Oxu.az məlumat verib.
Bu səhifəni Baş Dövlət Yol Polisi İdarəsinin rəsmi hesabı zənn edən vətəndaşlar oraya şikayətlərini ünvanlayıblar. Lakin müraciətlərin cavabsız qaldığını görən bir neçə nəfər bu barədə məlumat yayıb, bununla da saxtakarlığı ifşa ediblər.
Baş Dövlət Yol Polisi İdarəsinin (BDYPİ) şöbə rəisi, polis mayoru Rövşən Tağıyev vətəndaşları qeyd olunan saxta səhifəyə şəxsi məlumatlarını göndərməməyə çağırıb.
“Sənədlərinizi və şəxsi məlumatlarınızı rəsmi olmayan saxta səhifəyə göndərməyin. Daxili İşlər Nazirliyinin Baş Dövlət Yol Polisi İdarəsinin (BDYPİ) Facebook platformasında rəsmi səhifəsi yoxdur. Belə saxta səhifələrə müraciət ünvanlamayın.
Sözügedən faktla bağlı araşdırma aparılır. Araşdırmanın nəticəsində şəxs və ya şəxslər barəsində qanunamüvafiq tədbirlər görüləcək”, - deyə Tağıyev vurğulayıb.
