Bakı Gənclər Mərkəzində əfsanəvi xoreoqraf-baletmeyster Roza Cəlilova ilə görüş keçiriləcək. Bu haqda bu gün, 24 iyul tarixində Bakuplus.az AZƏRTAC-yə istinadən xəbər verir.
Tədbir görkəmli xoreoqraf, “Şərəf” və “Şöhrət” ordenləri kavaleri, Azərbaycanın Xalq artistinin 95 illiyinə həsr olunub. Görüşün proqramında Roza Cəlilova ilə söhbət və rəqs nömrələri nəzərdə tutulub.
Görüş iyulun 27-də saat 16:00-da Bakı Gənclər Mərkəzi, Azərbaycan Mədəniyyət Nazirliyi və Azərbaycan Gənclər və İdman Nazirliyinin dəstəyi ilə baş tutacaq.
Roza Cəlilova 1929-cu il mayın 17-də anadan olub. 1947-ci ildə Bakı Xoreoqrafiya Məktəbinin klassik şöbəsini fərqlənmə diplomu ilə bitirib. İki il Azərbaycan Opera və Balet Teatrının balet truppasında işləyib. Xalq artisti 30 ildən artıq müddətdə Azərbaycanı Kanada, Çin, ABŞ, Avropa ölkələri, Türkiyə, İraq, Efiopiya, Mərakeş və digər dövlətlərdə keçirilən beynəlxalq festivallarda təmsil edib.
