Paytaxtın Nərimanov rayonu, Fətəli Xan Xoyski, 128 ünvanında yerləşən yataqxananın sakinləri təhlükə altında yaşayırlar. Bu haqda bu gün, 5 dekabr tarixində Bakuplus.az ATV-yə istinadən xəbər verir.
59 yaşı olan və 120 ailənin yaşadığı binanın 4-cü mərtəbəsində beton plitədən olan tavan çöküb. Nəticədə hamam otağındakı su boruları zədələnib və 2 gündür su aşağı mərtəbələrə axır.
“Əlimi yuyanda gördüm ki, tavandan qırıntılar tökülür. Hamamdan çıxıb o biri otağa keçən zaman tavan çökdü. Otaqdan bir neçə dəqiqə gec çıxsaydım başıma düşəcəkdi”, - deyə sakinlərdən biri bildirib.
Sakinlər hadisədən sonra evlərində yatmaqdan qorxurlar. Onlar rəsmi qurumlara müraciət etsələr də, müdaxilə edən yoxdur.
Bundan əlavə, tikili özü baxımsız və qəzalı vəziyyətdədir. Binada antisanitariya hökm sürür. Burada məcburi köçkünlər yaşayırlar.
2 saylı Xüsusi Təyinatlı Mənzil-Kommunal Təsərrüfatı Birliyindən bildiriblər ki, FHN binanın qəzalı olduğunu təsdiqləyib. Yaxın zamanda müvafiq addımlar atılacaq.
