Bakının Suraxanı rayonu, Hövsan qəsəbəsində çirkləndirilən su kanalı təmizlənib. Bu haqda bu gün, 8 aprel tarixində Bakuplus.az İctimai TV-yə istinadən xəbər verir.
Belə ki, çirkab suların Xəzər dənizinə axıdılmasının qarşısı alınıb, eləcə də ərazidəki məişət tullantıları təmizlənib. Bunun üçün xüsusi texnika və Ekologiya və Təbii Sərvətlər Nazirliyinin nümayəndələri, həmçinin Suraxanı RİH-nin əməkdaşları əraziyə cəlb olunublar.
Suraxanı rayon İcra Hakimiyyətinin şöbə müdiri Mehman Hüseynov bildirib ki, dövlət proqramında Xəzərin qovuşan hissəsində təmizləyici qurğunun tikilməsi nəzərdə tutulub. Həmçinin ötən il coğrafiya institutu çirkab suların qarşısını almaq üçün pilot layihə hazırlayıb. Ancaq işlər icra olunmur.
“Orada yoxlamalar aparmaq üçün dəfələrlə cəhd etmişik, yaxın qoymurlar. Biz artıq Təhsil Nazirliyinin tabeliyinə keçmişik və müəyyən çətinliklərimiz mövcuddur. Məsələn laboratoriyalarımız stabil işləmir”, – deyə Coğrafiya İnstitutunun əməkdaşı Ənvər Əliyev bildirib.
O, əlavə edib ki, laboratoriya düzələn kimi pilot layihəyə start veriləcək.
