Bakının Suraxanı rayonu, Hövsan qəsəbəsində çirkab sular dənizə axıdılır. Bu haqda bu gün, 1 aprel tarixində Bakuplus.az ATV News-a istinadən xəbər verir.
Qəsəbədən dənizə axıdılan kanalizasiya suları və atılan məişət tullantıları, plastik qablar ərazidə antisanitariya vəziyyəti yaradır. Bu səbəbdən ətrafı üfunət bürüyüb. Sözügedən vəziyyət illərdir davam edir.
Sakinlərin sözlərinə görə, ərazidə quraşdırılan təmizləyici qurğulardan heç biri işləmir.
“Bir neçə dəfə qurumlara müraciət etmişik, amma heç nə dəyişmir. Nə yata bilirik, nə nəfəs ala bilirik. Dəniz qırağı zibillə dolub”, – deyə sakinlər şikayət edirlər.
Onların sözlərinə görə, həmçinin yaxınlıqdakı açıq su kanalı da tullantılarla çirkləndirilir.
“Azərsu” ASC-dən bildirildi ki, kanal onların balansında deyil.
Suraxanı RİH-dən isə deyildi ki, əraziyə baxış keçiriləcək və ərazi plastik qablardan təmizlənəcək.
