Heydər Əliyev Mərkəzinin parkında uşaq festivalı keçiriləcək. Bu haqda bu gün, 31 may tarixində Bakuplus.az Report-a istinadən xəbər verir.
1 İyun – Uşaqların Beynəlxalq Müdafiəsi Günü ilə əlaqədar sözügedən parkda uşaq üçün tədbir keçiriləcək.
Festival zamanı mərkəzin parkı mövzular və əyləncə növləri üzrə zonalara bölünəcək. Burada maraqlı və fərqli əyləncələr, maarifləndirici proqramlar təqdim olunacaq. Uşaqlar üçün xüsusi ayrılan zonada səhnə qurularaq gənc istedadların ifasında konsert proqramı təşkil olunacaq.
Ekoloji zonada iqlim dəyişmələri, ətraf mühitin monitorinqi mövzularında dəyirmi masa, viktorina və interaktiv oyunlar təşkil olunacaq. “Tullantılara ikinci həyat” adlı ekoloji ustad dərsləri, “Yaşıl enerji” mövzusunda startaplar, həmçinin dron və robotların ətraf mühitin qorunmasındakı rolu nümayiş etdiriləcək.
Tədbir çərçivəsində idman zonaları, feysart, ”Street art”, animatorlar, eləcə də kitabxana, arxeoloji meydança, “PlayStation zonası” yaradılacaq.
“Bona Dea” Hospitalı uşaqların pulsuz göz müayinəsini aparacaq.
Uşaq festivalında Vətən uğrunda şəhid olan qəhrəmanlarımızın övladları, Bakıdakı uşaq evlərinin sakinləri, daun sindromlu uşaqlar da iştirak edəcəklər.
