Xətai rayonunda sakinlər binadakı nasaz liftdən narazıdırlar. Bu haqda 12 mart tarixində Realtv məlumat verib.
Əhmədli qəsəbəsi, Seyid Əzim Şirvani küçəsi 12, blok 1 ünvanında yaşayan sakinlər 4 həftədən çoxdur ki, mənzillərinə rahat qalxa bilmirlər. Buna səbəb isə liftin nasaz olmasıdır. 9 mərtəbəli binanın aşağı mərtəbəsində yaşayan sakinlər mənzillərinə qalxmaq üçün pilləkəndən istifadə edir. Yuxarı mərtəbələrə pilləkənlə hərəkət etmək isə sakinlərə çətinliklər yaradır.
“Mütəxəssislər yerində araşdırma aparıb və müəyyən edilib ki, liftin elektron platasında problem var. Bunun təmiri üçün bizim əməkdaşlarımıza bir neçə gün vaxt tələb olunub. Gün ərzində lift təmir olunacaq və sakinlərin istifadəsinə veriləcək”, - Bakı Lift-Təmir İstehsalat Birliyi məlumat verib.
Son 2 il ərzində Bakı şəhər ərazisində 1206 yeni müasir lift quraşdırılıb və bu proses gələcəkdə də davam etdiriləcək.
