I siniflərə sənəd qəbuluna start verilib. Bu haqda bu gün, 1 may tarixində Bakuplus.az APA-ya istinadən xəbər verir.
2024-2025-ci tədris ili üçün sənəd qəbulu elektron qaydada 13 sentyabr tarixinə qədər davam edəcək. Azərbaycan bölməsi üçün məktəb və müəllim seçimi 3 may-13 sentyabr tarixlərində olacaq. Tədris digər dillərdə aparılan bölmələr üçün məktəb və müəllim seçimi 12 iyun-13 sentyabr tarixlərini əhatə edəcək.
Həmçinin tədris digər dillərdə aparılan bölmələr üçün müsahibəyə qeydiyyat 3 may-17 may tarixlərində aparılacaq, müsahibələr isə 7 may- 30 may tarixlərində təşkil ediləcək.
Bundan əlavə cari ilə qəbulla bağlı yeniliklər tətbiq olunacaq:
- Valideynlər ölkə üzrə prioritet tətbiq olunan bütün ümumi təhsil müəssisələri, prioritetin tətbiq olunacağı tarix və saat haqqında proses başlamadan öncə məlumat əldə edə biləcəklər. Linkə daxil olaraq, təhsil müəssisələrinin müəyyən edilmiş mikroəraziləri haqqında məlumat əldə etmək olar.
- Valideynlər mektebeqebul.edu.az saytında yaratdıqları şəxsi kabinetin “ərazi yoxlanışı” bölməsində Azərişığın abunə kodunu yazaraq həmin əraziyə uyğun gələn məktəblər haqqında məlumat əldə edə biləcəklər.
- Bakı Avropa liseyi, Respublika İncəsənət gimnaziyası və Bülbül adına orta ixtisas musiqi məktəbinin müsabiqəsində iştirak etmək üçün övladlarını qeydiyyatdan keçirən valideynlər, eyni zamanda digər ümumi təhsil müəssisəsini seçə bilərlər. Müsabiqədə uğur qazandıqda digər ümumi təhsil müəssisəsində olan sorğusu avtomatik olaraq silinəcək.
