I və IV ixtisas qrupları üzrə qəbul imtahanlarının nəticələri açıqlanıb. Bu haqda bu gün, 15 iyun tarixində Bakuplus.az Dövlət İmtahan Mərkəzinə istinadən xəbər verir.
2 iyun 2024-cü il tarixində keçirilmiş qəbul imtahanlarının nəticələri elan olunub.
İmtahanda iştirak edən abituriyentlər nəticələri, cavab kartı və cavab vərəqinin qrafik təsvirləri, həmçinin hər bir açıq tipli tapşırıq üzrə qiymətləndirmə meyarları ilə buradan tanış ola bilərlər. Həmçinin mobil operatorlar vasitəsilə imtahana buraxılış vərəqəsində verilən kodu 7727 nömrəsinə göndərməklə də öyrənmək mümkündür.
İmtahanda iştirak etmək üçün ərizə təsdiq etmiş 35.966 abituriyentdən 1871 nəfər imtahanda iştirak etməyib. İmtahanda iştirak edən abituriyentlərdən 11 nəfər qaydaları pozduğuna görə imtahandan xaric olunub və nəticələri ləğv edilib.
Bu imtahanda I ixtisas qrupu üzrə ən yüksək nəticəni 10 nəfər göstərib. IV ixtisas qrupu üzrə isə ən yüksək nəticəni 397,0 bal toplayan V.Veysəlov adına Gəncə şəhər 30 saylı məktəbinin məzunu Əhmədova Nəzrin Ramil qızı göstərib.
