Nəsimi rayonu, Abbas Səhhət küçəsinin bir tərəfində hündürmərtəbəli lüks binalar inşa olunur, digər tərəfdə isə onlarla ailə acınacaqlı vəziyyətdə yaşayır. Tikinti işlərinin aparıldığı ərazidə yaşayan sakinlər MTK-nın ödədiyi kompensasiya ilə razılaşmırlar. Məhz bu səbəbdən onlar bu cür vəziyyətdə yaşamağa məcbur qalıblar. Bu haqda bu gün, 15 iyul tarixində Bakuplus.az ATV-yə istinadən məlumat verir.
Sakinlərin dediklərinə görə, onlar uzun müddətdir ki, tikinti şirkəti ilə danışıqlar aparırlar. Ancaq orta məxrəcə gələ bilmirlər. Onlara təklif olunan kompensasiya məbləği qaneedici deyil və sakinlər razılıq əldə edilənə qədər mənzillərini tərk etmirlər.
Vətəndaşların əksəriyyətinin mənzillərinin sahəsi balaca olduğuna görə onlar MTK-dan mənzil tələb edirlər. Digərləri isə hər kvadratmetrə görə 3000 manat istəyirlər. Elə sakinlər də var ki, şirkətdən bir mənzil əvəzinə, bir-neçə mənzil əldə etməyə çalışırlar.
Problemlə bağlı tikinti işlərini həyata keçirən “Kapital City” MTK-dan bildirildi ki, sözügedən ünvanda yaşayan hər bir ailə ilə danışıqlar aparılıb və 60-a yaxın ailə ilə razılıq əldə edilib. Mənzillərini tərk etmək istəməyən ailələr isə mənzillərinin bazar dəyərindən daha artığını tələb edirlər. Bəziləri isə inşa edilən binadan ailə üzvlərinin hər birinə ayrı-ayrılıqda mənzil tələb edirlər. Amma buna baxmayaraq, şirkət rəhbərliyi tərəfindən sakinlərlə yenidən danışıqlar aparılacaq.
